Djamars 19 di mart, representantenan di diferente organisashon a bini huntu na museo Terramar pa un reunión organisá pa Bonaire Bon Transition (BBT). Entre e presentenan tabata e Gezaghèber di Boneiru i representantenan di WEB, Curoil, BIA, BOPEC, ContourGlobal i ministerio di I&W.
Durante e reunion, Walter Wattenbergh, direktor di BBT, a enfatisá e dedikashon konstante di BBT i su partnernan pa un suministro di energia sigur i mas sostenibel na Boneiru. El a enfatisá e rol krúsial di kolaborashon entre e diferente organisashon pa realisá e vishon aki.”Kambio struktural ta posibel solamente uniendo tur hende su ekspertisio i trahando huntu,” Wattenbergh a deklará.
E reunion a ofresé un plataforma pa diskushon i kolaborashon entre diferente organisashon envolví, ku meta pa hasi e infrastruktura di energía na Boneiru mas mihó i mas sostenibel. Durante e reunion tambe a diskutí desaroyonan resien, manera e partisipashon di BBT den parke di panel solar, realisá pa ContourGlobal.
Banda di enfatisá e progreso riba tereno di energia renobabel, tambe a diskutí e plan pa konstrukshon di un terminal di kombustibel nobo. Apesar di esfuersonan riba tereno di energia renobabel, e terminal aki ta keda nesesario pa almasenashon i distribushon sigur di kumbustibel na Boneiru. E terminal moderno lo reemplasá puntonan di almasenashon eksistente.
Bon bini na e boletin di febrüari 2024!
Den e edishon aki:
- BBT lo bira kolaborador den e parke di panel solar na Boneiru, den un partnership ku ContourGlobal, pa mantené e tarifanan di energia bou di kontrol i redusí dependensia riba kombustibel fosil.
- Bonaire Brandstof Terminals ta kambia di nòmber pa Bonaire Bon Transition (BBT) i ta enfoká mas riba energia duradero.
- BBT ta trahando riba permisonan pa konstrukshon di un terminal moderno di kombustibel na Boneiru, un proseso ku ta rekerí koordinashon kuidoso i kooperashon ku diferente autoridatnan. Konstrukshon ta sperá pa kuminsá na fin di 2024 o komienso di 2025, dependiendo di e proseso di permiso.
Lesa henter e boletin den format .PDF aki: Boletin Bonaire Bon Transition 15-02-24 (na Hulandes)
Dia 12 di aprel, Sekretario General suplente di ministerio di Asuntunan Ekonómiko i Klimat, Gerdine Keijzer-Baldé, a bishitá Boneiru pa diskutí desaroyonan riba tereno di suministro di energía. Durante su bishita, el a papia ku gezaghèber Edison Rijna i miembronan di kabinèt Hennyson Thielman i Jolinda Craane tokante e nesesidat di un almasenamentu sigur di kumbustibel i ekspanshon di energía duradero.
Un tópiko importante di e diskushon tabata e konstrukshon di tankinan nobo pa almasená kumbustibel i garantisá un depósito sigur. E tankinan eksistente ta bieu i tin mester di reemplasá nan. Paralelamente ku e konstrukshon di e tankenan nesesario pa almasená kumbustibel, ta trahando riba ekspanshon di energía duradero. Keijzer-Baldé a bishitá e tereno di Contour Global, unda aktualmente ta konstruí un parke solar nobo. Apart for di panelnan pa genera energía, ta bini tambe un bateria pa almasená e energía aki. Lo por sperá ku e parke solar nobo aki ta kuminsá traha den e luna di september di e aña aki. Además, a diskutí e plan pa ekspanshon i renobashon di e park eóliko aktual.
E invershon pa e depósito nobo di kumbustibel ta wordu hasi dor di Bonaire Brandstof Terminals (BBT), establesé dor di ministerio di EZK. Via BBT, tambe ta wordu invershá den e parke solar nobo i e park eóliko mas grandi pa futuro. Gezaghèber Rijna ta kontentu ku e atenshon ku ta duna pa e desaroyo riba tereno di suministro di energía pa Boneiru. Tur parti ta wak e importansia di ekspanshon i desaroyo di energia duradero pa Boneiru, spesialmente mirando e kresementu di poblashon i e kresiente demanda pa energía.
Kralendijk, 13 di yüni 2022 – Bonaire Brandstof Terminals BV (BBT) i Curoil ta bai traha huntu pa desaroyá i realisá un terminal nobo pa kombustibel, ku lo bini pegá ku Aeropuerto Internashonal di Boneiru. Riba e fecha di 13 di yüni, e direktornan di e dos kopanianan a firma un akuerdo di kolaborashon. E terminal nobo lo ta operativo no mas lat ku aña 2025.
Na e “Airport Terminal” nobo, lo deskargá i almasená tur kombustiber pa Boneiru na un manera seif. E terminal lo kontribuí tambe na salbaguardiá e suministro konfiabel di energia pa Boneiru. Den pasado tabatin momentunan di hopi prekupashon pa/ku e kontinuidat di suministro di energia, kual a kondusí na nasementu di e kompania BBT, ku partisipashon di gobièrno di Hulanda komo úniko akshonista. BBT ta responsabel pa desaroyá i finansiá e proyekto aki. Curoil lo ta responsabel pa e operashon i mantenshon di e terminal di kombustibel, tambe pa kompra i distribushon di kombustibel.
Sostenibilidat na Boneiru
Apesar ku kombershon pa un sistema energétiko sostenibel na Boneiro tin e prioridat di mas haltu, por lo pronto uso di kombustibel fosil lo keda nesesario den e totalidat energétiko. Esaki lo ta pa entre-otro tráfiko aerio i tambe riba momentunan ku tin tiki bientu. Aktualmente produkshon di koriente ta dependé pa gran parti di kombustibel fosil, komo ku na Boneiru mas-o-menos 30% di e koriente ta ser produsí ku sistemanan sostenibel (bientu i solo). Ta ferwagt ku e parti energétiko sostenibel to krese pronto. Ya kaba tin algun partido ku ta traha duru riba esaki, entre otro BBT.
Un terminal parew i seif
Konsiderando e ambishon pa den futuro serkano e suministro di koriente na Boneiru lo ta kompletamente bèrdè, esta sostenibel, uso di kombustibel fosil lo redusí. Pa e motibu aki e diseño di e terminal nobo lo ta modesto, di un tamaño relativamente chikitu. Den e sentido aki no por kompará e terminal nobo ku e terminal di BOPEC, na e parti Nort di Boneiru. Sinembargo, ku e “Airport Terminal” lo salbaguardiá e almasenahe di un inventario stratégiko sufisiente di gasolin, diesel, kombustibel pa avion i fuel. Lo no konstruí un pier nobo, komo ku lo hasi uso di e fasilidat eksistente pa mara i deskargá barku.
Pa pregunta por tuma kontakto ku Direktor di Proyekto, Marcelino de Lannoy via info@bbtbonaire.com.
Komunikado di Prensa BBT Bonaire, 7 december 2021
Kralendijk, 7 di desèmber 2021 – Ministerio di Asuntunan Ekonómiko i Klima (EZK) a destiná 10 miyon euro pa yuda agilisá pa e proseso di suministro di energia na Boneiru bira mas duradero. Parlamentu Hulandes (Tweede Kamer) a aprobá esaki siman pasá pa asina duna oido na e proposishon di Sekretario di Estado Dilan Yeşilgöz-Zegerius (VVD). Na e momentu aki na Boneiru masomenos 25% di su koriente ta wòrdu produsí na un manera ku ta sostenibel, esta ku uso di rekusonan duradero. Pa gran parti e isla ta dependé di kombustibelnan fosil, kaminda e último añanan aki e infrastruktura pa suministro di kombustibel ta bou di preshon.
A disidí pa e sèn aprobá ser agregá na e fondo propio di e kompania BBT, un kompania propiedat di estado Hulandes, ku a wòrdu fundá den luna di aprel di e aña aki. Ku e desishon aki e kompania estatal por atkerí kapital adishonal pa invershonnan den energia solar i di bientu, lokual ta netamente konforme e Akuerdo Klimatológiko (Klimaatakkoord). BBT tin komo su propósito pa organisá e almasenahe di kombustibel na Boneiru na un manera mas sigur i konfiabel i pa stimulá produkshon di koriente na un manera duradero. Algun luna pasá BBT a inisiá su promé pasonan ku e entrega ofisial di e plannan di konstrukshon di un terminal di almasenahe serka di aeropuerto.
Segun Marcelino de Lannoy, kende a kuminsá dia 1 di Sèptèmber komo Direktor di Proyekto pa BBT i ku tin añanan trahando riba tereno di suministro di energia na Korsou i Boneiru, e sèn ku a risibí ta hopi nesesario: “Na Boneiru tin oportunidatnan grandi pa transishon energétiko duradero. E rekursonan finansiero aki a habri kaminda pa nos tuma pasonan serio pa asina energia duradero bira aksesibel pa hopi hende na Boneiru. Ta nos ambishon pa despues di tempu lo produsí entre 70 pa 80% di tur koriente na un manera duradero. Na mes momentu ta rekonosé ku kombustibel fosil lo keda nesesario, por ehèmpel pa tráfiko aerio i transporte lokal riba e isla.”
Na e momentunan aki BBT ta hiba kombersashon ku partnernan riba e isla, manera kompania di awa i elektrisidat WEB i ku Contour Global. “Huntu nos ta investigá kiko por, kiko ta nesesario i unda nos por yuda. Nos ta trahando duru pa yega na plannan konkreto i nos ta spera di por kompartí esakinan pronto ku Boneiru.” Tambe tin estudionan ku sentro di investigashon tékniko-físiko na Hulanda, TNO, ta hasiendo riba petishon di EZK, pa bini ku un mapa di guia pa yega na un sistema energétiko pa e parti Karibense Hulandes ku ta 100% duradero. Ta ferwagt ku lo presentá e mapa di guia aki na Tweede Kamer na kuminsamentu di e aña benidero.
Pa kualkier pregunta, por tuma kontakto ku Direktor di Proyekto Marcelino de Lannoy via info@bbtbonaire.com.
BBT a lanta den luna di aprel di 2021 komo un kompania propiedat di estado Hulandes. BBT tin komo mandato pa sigurá suministro di energia pa Boneiru, sufisiente pa por biba, traha i disfrutá. Sigurando e suministro di kombustibel huntu ku e stimulashon pa transishon pa un sistema energétiko duradero, BBT ta sòru pa “bon energia” pa Boneiru.
Riba 26 di aprel 2021 a funda Bonaire Brandstof Terminals. E partisipashon estatal, di kua EZK ta 100% akshonista, lo bai remediá pa término largu e situashon preokupante ku suministro di kombustibel na Boneiru tabata den.